Chery Tiggo 2 Latin NCAP-тың апаттық сынақтарынан өте алмай, бірде-бір жұлдыз алмады

Chery Tiggo 2 шағын кроссовері Latin NCAP краш-тестінен сәтсіз өтті — бірде-бір жұлдыз ала алмады. Базалық нұсқасында тұрақтандыру жүйесі мен төрт қауіпсіздік жастығы болғанына қарамастан, көлік өте төмен нәтиже көрсетті. Сынақтар кузов құрылымының беріктігі жеткіліксіз екенін, ал жүргізуші мен жолаушылардың қорғанысы көңіл көншітпейтінін көрсетті. Оның үстіне, ауыр жол-көлік оқиғасы кезінде көліктің өртену қаупі бар.

Әртүрлі нарықтарда Tiggo 2 Pro, Tiggo 2 Pro Max немесе Chirey Tiggo 2 атауымен сатылатын көлікпен жүргізілген маңдайдан соқтығысу сынағында кузовтың күштік элементтері мен жүргізуші аяғы тұсындағы панельдер қатты деформацияланды. Сынаққа қатысқан адамдардың кеуде тұсына да шамадан тыс күш түсті. Бүйірлік қауіпсіздік перделері болмағандықтан, сарапшылар бағанаға соғылу сынағын жүргізе алмады. Ал артқы орындықтарда алдын ала тартқыштар мен күш шектегіштердің болмауы жолаушылардың қорғанысы бойынша нашар нәтижеге әкелді. Бойы аласа ересек адамдардың өзі тиісті деңгейде қорғалмады.

Балаларға да қауіп төнді. Соққы кезінде үш және он жастағы балаларды бейнелейтін манекендердің басы мен мойнына сыни деңгейде күш түсті. Арнайы ұстап тұратын құрылғыдағы бүлдіршін бүйірден соғылғанда одан ұшып кетуі, ал басы қауіпсіз аймақтан шығып кетуі мүмкін еді.

Басқа көрсеткіштерге келсек, жаяу жүргіншілердің қорғанысы 48,89%, ал жүргізушіге көмек көрсететін қосалқы жүйелердің көрсеткіші 45,45% болды. Жалпы нәтиже сарапшыларда елеулі күмән туғызды. Latin NCAP бас хатшысы Алехандро Фурас Chery компаниясының қолжетімді кроссоверлер класындағы өнімдерінің қауіпсіздігіне күмән келтіріп, сатып алушыларға тәуелсіз краш-тест нәтижелері туралы міндетті түрде ақпарат беруді қолдайтынын айтты.

Қауіпсіздік сынағындағы бұл сәтсіздік брендке қатысты басқа да жағымсыз жаңалықтармен тұспа-тұс келді. Қазан айының басында Малайзияда Chery-ге тиесілі Omoda суббрендінің Omoda 5 моделінен күрделі ақау табылды: көліктің артқы осі түсіп қалды. Осы оқиғадан кейін Малайзия билігі бұл сериядағы жаңа көліктерді тіркеуге уақытша тыйым салды, ал компания тоғыз мыңға жуық көлікті кері қайтарып алуға мәжбүр болды. Осы оқиғалар аясында Chery президенті Инь Тунъюэ клиенттерден кешірім сұрап, компания үшін жылдам пайда табудан гөрі әлемдік нарықтарда орнығу маңызды екенін атап өтті.