Toyota Еуропа мен АҚШ-та бағаны көтермекші

Toyota микрочиптердің жетіспеушілігінен шегіп жатқан шығындарын Еуропа мен АҚШ-та автомобильдерінің бағасын көтеру арқылы жаппақшы. 2022 жылдың ІІІ тоқсанында жапон компаниясының операциялық табысы төрттен бірге, 3,87 млрд долларға (1,8 трлн теңге), ал 2022 жылғы таза табысы 3 млрд долларға (1,4 трлн теңге) азайып кетті.

Toyota-дағылар бағаны қаншаға көтеретіндерін әлі айқындаған жоқ. Toyota-ның қоғаммен байланыс жөніндегі директоры Дзюна Нагатаның айтуынша, компания клиенттердің наразылығын тудырмас үшін бағаны көп қымбаттатқысы келмейді. АҚШ-та Toyota Carolla 25 мыңнан 30 мың долларға дейін (11,4 млн-нан 13,7 млн теңгеге дейін) қымбаттайды делінуде.

«Бағаның ыңғайлы деңгейін табу үшін көп ойлану үстіндеміз. Құрамдастардың қымбаттауы автомобильдің түпкілікті құнына қатты әсер етіп отырған жайы бар», — деп мәлімдеді Дзюн Нагата.

Toyota-ның жоспары бойынша, 2022 қаржы жылында (2023 жылдың наурызына дейін) компания жоспарлағандай 9,7 млн емес, 9,2 млн автомобиль шығаратын болды. Бұған микрочип тапшылығы себеп болып отыр, деп жазады Carscoops.