Қыс маусымында жазғы дөңгелекпен жүрген көлік иелеріне айыппұл салынады

Солтүстік Қазақстан және Шығыс Қазақстан облыстарында полиция қыс айларында жазғы шинамен жүргендерге айыппұл салынатынын ескертті. 

Кеден одағының 018/2011 «Доңғалақты көлік құралдарының қауіпсіздігі туралы» техникалық регламенті бойынша қыста (желтоқсан, қаңтар мен ақпан айларында) қысқы шина салынбаған көлік құралдарын пайдалануға тыйым салынады.

Қысқы шиналар көлік құралының барлық дөңгелегіне орнатылуға тиіс. Оның арнайы таңбасы, сондай-ақ «М+S», «M&S», «M S» белгісі болады.

Қысқы дөңгелекте бүртабан болған жағдайда көліктің артқы терезесіне белгі жапсыру қажет.

Қыста жазғы шинамен жүргендер әкімшілік құқық бұзушылық туралы кодексінің 590-бабы, 5-бөлігі («Көлiк құралдарын пайдалану қағидаларын бұзу») бойынша 5 АЕК (15 900 теңге) көлемінде айыппұл төлейді.