«АвтоВАЗ» Lada көліктерін сататын онлайн-дүкен ашты

«АвтоВАЗ» Lada модельдерін сататын онлайн-дүкеннің іске қосылғаны туралы хабарлады. Интернет-дүкенге Lada.ru ресми сайтындағы «Сатып алушыларға» / «Қолжетімді көліктер» деген бөлім арқылы енуге болады. Қызмет көрсету жүйесінде АвтоВАЗ-дың ресми дилерлеріндегі қолда бар жаңа көліктер жайлы ақпарат көрсетіледі. Ал сатылатын көліктің жабдықталуы туралы және қосымша сипаттамаларын компанияның дилерлері жүйеге өздері енгізеді.

Аталмыш жүйенің арқасында тұтынушы өзіне қажетті көлікті таңдап, бірден брондай алады. Сонымен қатар, платформада қажетті көлікті іздеу үшін көліктің түрі, аймақ және елдімекендер, бағасы, арнайы ұсыныстар секілді сүзгілер қарастырылған.

Жүйеде көлікті алдын ала төлемсіз-ақ брондауға болады. Оған қоса, сатып алушы қосымша жабдықтарды кіріктіре алады. Сондай-ақ, платформада трейд-ин бағдарламасы және несие қарастырылған.

Қазіргі уақытта жүйеде мыңнан астам Lada көлігі ұсынылып отыр.