Қазақстанда шетелдік нөмірлі көлікті заңдастыру қанша тұрады

2023 жылдың басынан бастап қазақстандықтар 2022 жылдың 1 қыркүйегіне дейін әкелінген шетелдік нөмірлері бар автомобильдерді заңдастыра алады.

Мәжіліс Салық кодексіне түзетулерді екінші оқылымда қабылдап, заң жобасын Сенаттың қарауына берді.

2023 жылғы 1 қаңтардан бастап қазақстандықтар 2022 жылғы 1 қыркүйекке дейін әкелінген шетелдік нөмірлері бар автомобильдерді заңдастыра алады делініп отыр. Бастапқы тіркеу құны 200 мың теңге болады.

Айта кетейік, бұл сан түпкілікті емес. Алғашқы тіркеу үшін 200 мың теңге соманы әзірге тек Мәжіліс қабылдады. Енді заңнамаға түзетулерді Сенат қарайтын болады. Онда депутаттар заңдастырудың айтылған құнымен келіспеуі мүмкін.

Сонымен қатар, Қазақстан президенті Қасым-Жомарт Тоқаев өз тапсырмасында 2022 жылдың 1 қыркүйегіне дейін әкелінген шетелдік нөмірлері бар автомобильдерді бастапқы тіркеудің нақты сомасын жарияламады. Сол кезде ол өзінің Жолдауында заңдастырудың құны 200-ден 250 мың теңгеге дейін болуы тиіс деп мәлімдеді.

«Бұл норма мемлекеттік бюджет кірістерінің қысқаруына әкеп соғады. Көлік құралдарының көрсетілген санаттары бойынша утильдік алымды төлеуді реттеуге қатысты Экологиялық кодекске түзетулер «Қазақстан Республикасының кейбір заңнамалық актілеріне Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізу туралы» заң жобасы шеңберінде пысықталатынын қосымша атап өтеміз», — делінген Парламент Мәжілісінің қаржы және бюджет комитетінің қорытындысында.

Бұған дейін ішкі істер министрлігінде шетелдік нөмірлері бар қандай автомобильдер заңдастыру бағдарламасына кірмейтіні айтылды:

• 2022 жылғы 1 қыркүйектен кейін әкелінген;
• іздеуде жүргендер;
• заңды немесе сот жүктемелері бар;
• бұрынғы елде есептен шығарылмаған;
• оң рульді көліктер;
• толық кедендік тазартудан өтпеген;
• иелерінде құқық белгілейтін құжаттары жоқ

Қазір Қазақстанда шетелдік нөмірі бар 300 мыңға жуық автомобиль жүр. Олардың барлығы дерлік Еуразиялық одақ елдерінен әкелінген. Бұл ретте CARMA.KZ редакциясының сауалына, Ішкі істер министрлігі олардың қаншасы заңдастырылатынын білмейтінін мәлімдеді.