Электромобильдерге арналған аккумуляторларды Семей полигонына көмуді ұсынды

Энергетика министрлігінің мәліметінше, елімізде тек қорғасын-қышқылды аккумуляторлар өндіріледі және қайта өңделеді. Олар қуатты әрі мықты болғанымен, төмен температураларда істен шығып қалады. Сондықтан, электрлі көліктерде литий-ионды аккумуляторлар қолданылады.

Бұл ретте оларды қайта өңдеу мәселесі туындайды. Бүкіл әлемде қатты материалдан құнды элементтерді шаймалау арқылы гидрометаллургия технологиясы қолданылады. Бұл аккумулятор жинағының 90%-ына дейін қайта өңдеуге мүмкіндік береді. Қайта өңделмеген қалдықтар қауіптіліктің II санатына жатады. Сондықтан қоршаған ортаға, адам денсаулығына және жануарларға зиянын тигізуі әбден мүмкін.

«Осыған байланысты, қайта өңделмеген литий-ионды аккумуляторлық батареяларды еліміздің шектеулі бөлігінде, атай айтсақ Семей ядролық қауіпсіздік аймағында көму ұсынылып отыр, — делінген энергетика министрлігі дайындаған Қазақстан Республикасының Электр энергетикасы саласын дамытудың 2035 жылға дейінгі тұжырымдамасында.

Литий-ионды батареяларды өндіру мәселесіне келсек, елімізде барланған литий кен орындары қажетті шикізатты жеткізуге кемінде 10 жылға жетеді. Энергетика министрлігі осыны өз қажеттіліктері мен экспорт үшін жеткілікті деп санайды.