Toyota-ның жаңа электромобилінің фотосуреті жарияланды
Жаңа электрлі седан туралы ақпарат Қытайдың Өнеркәсіп және ақпараттық технологиялар министрлігінің сайтында пайда болды.
Жаңа Toyota bZ3 седаны Camry-ге қарағанда біршама ықшам болады. Оның ұзындығы — 4725 миллиметр, ені — 1835 миллиметр, биіктігі — 1475 миллиметр, Доңғалақ базасы — 2880 миллиметр.
Қытай нарығында автомобиль тек артқы жетекті нұсқада ұсынылмақ. Қозғалтқыштың қуаты — 184 немесе 245 ат күші, деп жазады қытайлық Autohome порталы.
Аккумуляторларды жеткізуді BYD концерні, ал Қытайда құрастыруды Toyota және FAW бірлескен кәсіпорны өз мойнына алады. Жаңа Toyota bZ3-тің болжалды бағасы шамамен 30 мың долларды (14,3 млн теңге) құрайды.
Көлікті 2022 жылдың көктемінде таныстыруды жоспарлаған. Алайда, жартылай өткізгіштерді жеткізудегі мәселелерге байланысты шығару уақыты кейінге қалдырылды. Toyota-ның өзі жаңа электромобильді әлі ресми түрде көрсетпегенін айта кетейік.
Ербол Мухамбаев, корреспондент
28.08.2022, 13:20
