Ауыл шаруашылығы техникасын жеңілдікпен алу қашан басталатыны айтылды
Үкіметте бағдарламаның қашан іске қосылатындығына қатысты кеңес өтті.
Қазақстанның Үкіметі ауыл шаруашылығы техникасын сатып алуға жеңілдетілген лизингті жиын-терім жұмыстары басталғанға дейін іске қосуды жоспарлап отыр. Бұл мақсатқа 40 млрд теңге бөлінеді.
Бағдарлама «Жасыл даму» АҚ-ға (бұрынғы РОП Операторы) жинақталатын қаражаттан қаржыландырылады. Бағдарламаның жүзеге асырылуын «Бәйтерек» холдингінің еншілес ұйымы қадағалайды.
«Бағдарламаның шарттары шағын және орта ауыл шаруашылығы құрылымдарының ауыл шаруашылығы техникасын сатып алуын ынталандыруға бағытталған», — деп хабарлады Ауыл шаруашылығы министрлігінің баспасөз қызметі.
Бағдарламаның шарттары бойынша қазақстандық өндірістен шыққан ауыл шаруашылығы техникасын да сатып алуға болады.
Үкіметтің 2022 жылғы шілдедегі кеңейтілген отырысында Қазақстан президенті Қасым-Жомарт Тоқаев ауыл шаруашылығы техникасын сатып алуға арналған лизингтік бағдарламаны іске қосуды тапсырған болатын. Мемлекет басшысы отандық ауыл шаруашылығы өндірушілері техника паркін жаңартуды қажет етеді. Өндірістік қауіпсіздік туралы айтпас бұрын, дәл осы мәселені шешу қажет деп мәлімдеді.
Ербол Мухамбаев, корреспондент
29.07.2022, 13:45
