Казақстан ЕАЭО бойынша автокөлік бағасының өсуі жағынан көш бастап тұр

Бұл туралы Өнеркәсіп және құрылыс министрі Ерсайын Нағаспаев сату мен нарықтық динамикаға қатысты деректерге сілтеме жасай отырып хабарлады. Оның айтуынша, бір жыл ішінде елде 205 мың автокөлік сатылған, оның 133 мыңы Қазақстанда шығарылған. Министр жергілікті өндірістегі көліктердің бағасы бақылауда екенін атап өтті.

«Ал әкелінетін көліктерге келсек, бұл – бизнес. Бағалар неге өсіп жатқанын қарау керек. Біз зерттеп, бизнес неге осындай көтеріңкі бағамен сатып жатқанын айтып береміз. Тағы бір екінші нарық бар, азаматтардың белгілі бір бағамен сату құқығын шектей алмаймыз ғой», — деп келтіреді Нағаспаевтың сөзін Informburo.kz.

Оның айтуынша, жақын уақытта министрлік Сауда министрлігімен бірлесіп импорттық көліктер нарығындағы жағдайды талдап, баға айырмашылығының себептерін түсіндіреді.

Бірінші вице-премьер Роман Скляр жағдайға түсініктеме бере отырып, шетелден әкелінетін тауарлардың бағасында айырмашылық бар екенін және бұл мәселені ЕАЭО аясында реттеу қажет екенін атап өтті.

«ЕАЭО елдеріне шетелден әкелінетін тауарлардың бағасында белгілі бір айырмашылық бар. Бұл мәселені сол ЕАЭО шеңберінде шешу қажет», — деді ол.

Еуразиялық экономикалық комиссияның (ЕЭК) мәліметінше, маусым айында Қазақстанда жеңіл автокөліктердің бағасы өткен жылдың сәйкес кезеңімен салыстырғанда 11,6%-ға өскен. Бұл – Еуразиялық одақ елдері арасындағы ең жоғары көрсеткіш.