Қытай толық жасырылған есік тұтқаларын пайдалануға тыйым салды

ҚХР Өнеркәсіп және ақпараттандыру министрлігі автомобильдерде толықтай жасырылған есік тұтқаларын қолдануға тыйым салатын ұлттық қауіпсіздік стандартын бекітті. Жаңа регламент 2027 жылғы 1 қаңтардан бастап күшіне енеді және жүксалғышты қоспағанда, әрбір есіктің сыртынан да, ішінен де механикалық түрде ашылу мүмкіндігі болуын талап етеді.

Ведомствода бұл шешім жол-көлік оқиғаларына байланысты қауіп-қатерлермен түсіндірілді. Ауыр апаттар кезінде электронды жүйелер істен шығуы мүмкін, соның салдарынан есіктер ашылмай, жолаушылар іс жүзінде көліктің ішінде қамалып қалуы ықтимал.

«Технологиялардың даму үрдістеріне бейімделу мақсатында министрлік қауіпсіздік талаптарын әзірледі. Бұл автомобильдерді жобалау кезінде қорғаныс деңгейін арттыруды қамтамасыз етеді», — деп атап өтті ведомствода.

Стандартта сыртқы есік тұтқаларының конструкциясына қойылатын талаптар да жеке көрсетілген. Кузов бетіне қатысты белгілі бір мөлшерде саңылау қалуы тиіс — ол қолғап киген адамның алақаны ескеріліп есептелген. Сондай-ақ автокөлік салонында есіктерді қолмен қалай ашуға болатынын түсіндіретін белгілер немесе иллюстрацияланған нұсқаулықтар орналастырылуы қажет.

Жаңа модельдер үшін бұл талаптар 2027 жылғы 1 қаңтардан бастап міндетті болады, ал қазір сатылымда жүрген автомобильдерге 2029 жылғы қаңтарға дейін өтпелі кезең қарастырылған. China Daily деректеріне сүйенсек, өзгерістер нарықтың елеулі бөлігіне әсер етеді: Қытайда ең көп сатылатын топ-100 электромобильдің шамамен 60%-ы жасырын тұтқалармен жабдықталған, олардың қатарында Nio ES8, Li Auto i8, Xiaomi YU7 және XPeng P7 модельдері бар.