Жол құрылыс мамандары біліктіліктерін арттыруға міндеттеледі

Қазақстан жол ғылыми-зерттеу институты («ҚазжолҒЗИ») заң жобасын әзірлейді. Оған сәйкес автожол мамандары өз біліктіліктерін арттыруға міндетті болады.

«Біз жол саласы мамандарының біліктілігін арттыру міндетін заңнамалық деңгейде бекітуді қалаймыз. Дайындалып жатқан заң жобасына тиісті ұсыныстар енгізілді. Дамыған елдерде компания қызметкерлерінің біліктілігі олардың беделіне, рейтингіне және басқа да факторларға әсер етеді. Қазақстанға да осындай жүйе қажет», ― дейді «ҚазжолҒЗИ» АҚ президенті Арман Әлібаева.

Сарапшылардың айтуынша, отандық жоғары оқу орындарында автожол мамандығының болмауы жолдарды жобалау, одан әрі олардың құрылысына айтарлықтай кедергі келтіреді. Жас мамандарға тәжірибе қажет болғандықтан, «ҚазжолҒЗИ» еліміздің жоғары оқу орындарымен бірқатар меморандумға қол қойды. Енді студенттер зертханалар мен учаскелерде тәжірибе жинай алады.