Шетелдік нөмірлі көліктердің қайсысы заңдастырылмайды

Президент Қасым-Жомарт Тоқаев Қазақстан халқына Жолдауында 2022 жылдың 1 қыркүйегіне дейін әкелінген шетелдік нөмірлі автокөліктерді заңдастыруға мүмкіндік беруді тапсырды. Бұл көліктер үшін утильдік алым және бастапқы тіркеу құны 200-250 теңгені құрайтын болады.

Қазір өкілетті мемлекеттік органдар заңға бір реттік заңдастыру акциясын өткізуге рұқсат ететін өзгертулер енгізіп жатыр.

Ішкі істер министірлігі шетелдік нөмірлі автокөліктердің қайсысы заңдастырылмайтынын атады:

• 2022 жылдың 1 қыркүйегінен кейін әкелінген;
• іздеу салынған;
• заңмен немесе сот бұғат салған;
• бұрынғы елде есептен шығарылмаған;
• оң рульді автокөліктер;
• кедендік тексерістен толық өтпеген;
• көлік иесінің құқығын анықтайтын құжаттары жоқ.

«Қазақстанға 2022 жылдың 1 қыркүйегіне дейін әкелінген барлық көлік кұралдары мәселесі бойынша, ішкі істер, мемлекеттік кірістер органдары және ұлттық қауіпсіздік шекара қызметі өзара ақпарат алмасады», — деді әкімшілік полиция комитеті төрағасының міндетін атқарушы Жандос Мұраталиев.

Сонымен қатар, Қазақстанда заңдастырылған көліктер жайлы барлық ақпарат көрші елдердегі кұқық қорғау органдарының деректер базасымен салыстырылатынын айтты.