Астанада жаңа Changan Uni-K моделі таныстырылды

Астанада Terra Motors-тың дилерлік орталығында Changan автомобилінің қазақстандық нарық үшін жаңа — Uni-K моделі көрсетілді. Көліктің (Comfort жиынтығы) құны 17 490 000 теңгеден басталады. Сондай-ақ Luxe және Tech жиынтықтары да қолжетімді. Олардың әрқайсысының құны 18 690 000 және 19 990 000 теңге тұрады.

Дилерлердің мәлімдеуінше, қандай жиынтық түрі болмасын, автомобильдердің барлығы 8-сатылы «автомат» беріліс қорабымен жұптасқан қуаты 226 ат күшіне тең екі литрлік турбоқозғалтқышпен жарақтандырылған.

Comfort жиынтығының автомобилі алдыңғы жетекті болып келеді, ал одан қымбатырақ нұсқалары — толықжетекті. Көлік 100 шақырымға 8,5-8,9 литр отын жұмсайды.

Естеріңізге сала кетейік, Қазақстанда қытай автомобильдерін шығаратын зауыт салу көзделіп жатыр, бұл туралы осыған дейін «Астана Моторс» хабарлаған. Компания Қытайдың Chery Automobile Company, Changan International Corporation және Great Wall Motor көлік концерндерімен меморандумға қол қойылғанын айтты. Аталған келісімдер бойынша Қазақстанда Chery, Haval және Changan көліктері шығарылады.

«Астана Моторс» 2023 жылы Алматыдағы индустриалдық аумақта мультибренд зауытының құрылысын бастамақ. Кәсіпорын 2025 жылы іске қосылады. Болжам бойынша, жаңа зауыттың қуаты жылына 90 мың автомобиль шығара алады. Олардың басым бөлігі ТМД елдеріне экспортталады делінген.